Олжас Бектенов 16 жасқа толмаған балалардың әлеужеліге кіруіне шектеу қоюға қатысты заң жобасының әзірленіп жатқанын айтты. Бұл туралы Baribar.kz хабарлап отыр.
Құрылтайдың ресми сайтында Олжас Бектеновтің депутат сауалына берген жауабы жарияланды. Сауалда 16 жасқа толмаған балалардың әлеужеліге тіркелуін шектеу және олардың цифрлық ортадағы қауіпсіздігін қамтамасыз ету мәселесі көтерілген.
Премьер-министрдің айтуынша, үкімет онлайн-платформаларда 16 жасқа толмаған қолданушыларды тіркеу тәртібін реттейтін қолданыстағы заңнамаға өзгерістер әзірлеген. Қазір тиіс түзетулер қаралып жатыр.
Заңнамадағы өзгерістер қабылданғаннан кейін онлайн-платформалардағы қолданушылардың жасын тексеру тәртібі әзірленеді. Бұл жұмысқа мәдениет және ақпарат министрлігі мен цифрлық даму, инновациялар және аэроғарыш өнеркәсібі министрлігі жауапты болады.
Бектеновтің мәліметінше, болашақта Meta компаниясы қолданушылардың жасын тексеруге арналған AgeKey жүйесін енгізуді жоспарлап отыр. Технология биометрия аутентификациясына, саусақ ізі немесе бет-әлпетті тану тәсіліне ұқсас принциппен жұмыс істейді.
Жаңа талаптарды енгізу үшін өтпелі кезең қарастырылған. Осы уақыт ішінде онлайн-платформаларда 16 жасқа толмаған қолданушылардың қолданыстағы аккаунттары уақытша бұғатталады.
Естеріңізге салайық, 2025 жылдың желтоқсанында Қазақстанда 16 жасқа толмаған балаларға әлеужеліге кіруге тыйым салу туралы заң жобасы талқыға салынды. Биыл мамыр айында құжат мемлекеттік органдармен келісу кезеңінде екені хабарланды.
