Құрметті әріптестер! Сіздерді Маңғыстау облыстық сотының 50 жылдық мерейтойымен шын жүректен құттықтаймын! Киелі Маңғыстау өңірінде сот жүйесінің құрылып, қалыптасуының өзіндік бай тарихы бар.
Қазақ ССР Жоғарғы Кеңесі Президиумының 1973 жылғы 23 наурыздағы Жарлығына сәйкес, қазіргі Маңғыстау облыстық соты құрылды. Соттың алғашқы құрамында Қ.Мамбетов, В.Рудяков, Ш.Нәжмединов, Б.Көшекбаев, Н.Қарабасова, Т.Шибаковалар болды. Әр жылдары Маңғыстау облыстық сотының төрағалары болып Қ.Мамбетов, Н.Чиняев, М.Смағұлов, С.Абдуллаев, Д.Әміров, Ж.Аланов және Е.Дәулиев абыройлы қызмет атқарды. Маңғыстаулықтар облыстық сотта еңбек етіп, кейін Жоғарғы Соттың судьялары болған Н.Суханова, Т.Берқалиева, Ғ.Мақажанова, Н.Жолдасбаеваның, отставкадағы судьялар М.Нұрбеков, Г.Стикулова, Д.Жүсіпова, М.Смағұлов, М.Сабырбаев, Н.Чиняевтың есімдері мен еселі еңбектерін жақсы біледі, әрдайым құрмет тұтады.
Бүгінгі буын аға ұрпақтың өнегелі жолын лайықты жалғастыра отырып, сот төрелігін әділдікпен атқаруда. Алдағы уақытта да Жоғарғы Сот жүргізіп жатқан іргелі реформаларды сәтті жүзеге асыруға сүбелі үлестерін қосады деп сенеміз. Барлығыңызды облыстық соттың 50 жылдық мерейтойымен құттықтай отырып, зор денсаулық, толайым табыс, отбастарыңызға амандық пен бақыт тілеймін!
