Конституция күні қарсаңында ҚР Конституциялық Сотының төрағасы Эльвира Азимова Бас редакторлар клубының мүшелерімен кездесті.
Шара барысында Төраға конституциялық іс жүргізуге қабылданған өтініштер мен конституциялық бақылау аясында жоспарланған шаралар туралы айтып берді. Ал төрағаның орынбасары Бақыт Нұрмұханов жаңа жылдан бері жаңартылған форматта жұмыс істеп жатқан Конституциялық Соттың қызметінен хабардар етті. Төраға Конституциялық Сот ғимаратын таныстыру үшін экскурсия өткізіп, шағын және үлкен мәжіліс залы, кітапхана, баспасөз орталығын көрсетті. Сондай-ақ, шара барысында Конституциялық Соттың азаматтардың өтініштерін қабылдау орталығының салтанатты ашылуы өтті. Орталық өтініштерді қабылдау және бастапқы қарау, өтініштерді рәсімдеу, КС-ге өтініш беру тәртібі туралы ақпарат беру бойынша қызмет көрсетеді. Орталықта күту залы, өтінішті қабылдау кеңсесі, өзіне өзі қызмет көрсету аймағы, сот отырыстары туралы ақпараты бар стенд ілінген. Бас редакторлар клубының мүшелері жаңартылған КС мұражайының ашылуына да куә болды. Төраға мен «Қазақ газеттерінің» бас директоры Дихан Қамзабекұлы және Парламент Сенатының депутаты Бибігүл Жексенбай мұражайдың ашылу лентасын салтанатты түрде қиды.
А.ҚҰРМАНҒАЛИ, «Заң газеті»
