Қазақстан Президенті Қасым-Жомарт Тоқаев «Халық денсаулығы және денсаулық сақтау жүйесі туралы» кодекске, сондай-ақ «Жарнама туралы», «Ойын бизнесі туралы», «Міндетті әлеуметтік медициналық сақтандыру туралы» заңдарға өзгерістер мен толықтырулар енгізуді көздейтін «Қазақстан Республикасының кейбір заңнамалық актілеріне денсаулық сақтау, ойын бизнесі мәселелері және артық заңнамалық реттеуді алып тастау жөнінде өзгерістер мен толықтырулар енгізу туралы» заңға қол қойды, — деп хабарлайды Massaget.kz тілшісі.
Заңға енгізілген түзетулер екі негізгі бағытты қамтиды.
Бірінші бағыт — денсаулық сақтау саласындағы кейбір мәселелерді шешуге арналған. Онкологиялық ауруларды ерте анықтау мақсатындағы скринингтер шеңберінде амбулаториялық жағдайда көрсетілетін мамандандырылған медициналық көмек мемлекет кепілдік берген тегін медициналық көмектің көлеміне енгізілді. Бұл зерттеулер міндетті әлеуметтік медициналық сақтандыру жүйесінен шығарылды. Сондай-ақ, мүгедектігі жоқ азаматтарды есту аппараттарымен қамтамасыз етуге байланысты бірқатар мәселелер шешімін тапты.
Екінші бағыт — букмекерлік кеңселер мен тотализаторлар жарнамасына қатысты. Енді мұндай жарнаманы ұялы байланыс абоненттерінің құрылғыларына таратуға, сондай-ақ онлайн-платформаларда орналастыруға тыйым салынды. Букмекерлік кеңселер мен тотализаторлар жарнамасына рұқсат етілген бұқаралық ақпарат құралдарының тізімі қысқарылды – енді мұндай жарнама тек спорттық бағыттағы БАҚ арқылы ғана берілуі мүмкін. Сонымен қатар, бас бостандығын шектеу жазасына немесе шартты түрде сотталған тұлғаларға құмар ойындарға және (немесе) бәстерге қатысуға тыйым салынды.
Заң мәтіні ресми басылымда жарияланады.
