«Қазақстанның халық конгресі» жалпыұлттық қоғамдық қозғалысы саясат сахнасында қайта бой көтерді. 1991 жылы пайда болып, Тәуелсіз Қазақстанның алғашқы Конституциясының жобасын қалыптастыруға белсене қатысқан қозғалыс басшылары бүгін өздерінің бағдарламалық міндеттерін жүзеге асырудың нақты бес қадамын еліміздегі барлық қоғамдық бірлестіктері мен саяси партиялардың және бүкіл Қазақстан азаматтарын қолдауға шақырды.
Ол: ҚР Конституциясының 6-бабына «Жер және оның қойнауы халықтың басты меншігі болады. Бұл меншік әрқашан халыққа ғана тиісті болады» деген өзгерісті енгізу. Елімізде өндіріліп жатқан мұнай, көмір, түсті және сирек металдардың т.б. байлықтарымыздың пайдасынан әрбір қазақстандық азаматтың дербес шотына еншісін беріп отыру. Әрбір кәмелетке толған қазақстандық азаматты мемлекет есебінен кепілді баспанамен қамтамасыз ету. ҚР барлық азаматтарына мектепке дейінгі, орта арнаулы кәсіби және жоғары білім алуды ақысыз ету туралы өзгерістерді ел Конституциясына енгізу. Ауылшаруашылығы өндірісімен айналысу туралы шешкен әрбір қазақстандыққа жеке меншігіне тегін жер беру.
Белгілі қоғам және мемлекет қайраткері, экономика ғылымдарының докторы Омархан Өксікбаевтың айтуынша, бұлар «Қазақстан халық конгресінің» алғашқы бағдарламалық міндеттеріне жатады. Олар 1994 жылы Ата Заңның бабын материалдандырудың егжей-тегжейлі бағдарламасын ұсынды. Сол Олжас Сүлейменов: «Мемлекеттік банк республиканың әрбір азаматының атына дербес шот ашады. Оған мұнайдың әрбір тоннасынан бір тамшы түседі. Елде өндірілетін көмірдің, түрлі-түсті, қара және сирек металдардың әр тоннасынан үгінді түседі, сонда ғана кедей ұрпақ болмайды. Кейбір Араб Әмірліктерінің тәжірибесін зерттеу керек, ал біздің математиктер бұл халықтық байлықтарды халық пен мемлекеттің игілігі үшін бөлудің тамаша жүйесін жасайды» деген болатын.
Қозғалыстың баспасөз қызметінің хабарламасына қарағанда, олар өз ұсыныстарын Президенттің 2022 жылғы 16 наурыздағы жолдауын іске асыру шеңберінде Конституцияға өзгерістер енгізу жөніндегі жұмыс тобының қарауына жібермек.
Е.КЕБЕКБАЙ,
«Заң газеті»
