Жаңалықтар | Новости

Сақтандыру пакеті жоғары технологиялық қызметтерді пайдалануға мүмкіндік береді

Қазақстанда міндетті әлеуметтік медициналық сақтандыру жүйесі енгізілгелі бері жоғары технологиялардың көмегімен жасалатын қызметтердің қолжетімділігі артты. Медициналық сақтандыру қоры биылғы жылдың бастапқы 7 айында Алматы қаласы тұрғындарына аталған профильге жататын қызметтер үшін 8,3 млрд теңгеге жуық қаражат төледі.

МСҚ Алматы филиалы директоры Тілеухан Әбілдаевтың айтуынша, пациенттерге көрсетілген жоғары технологиялық қызмет ақысы медициналық сақтандыру есебінен төленеді. 7 айда алматылық дәрігерлер жоғары технологияларды пайдаланып 3307 медициналық қызмет көрсеткен.

«Қаладағы медицина ұйымдарының материалдық-техникалық базасы мен мамандар құрамы жамбас пен тізе буындарын алмастыруға, жүрекке дефибриллятор қоюға, бас сүйек ішіне стент орнатуға, аневризмге шалдыққан тамырларды эмболизация жасауға мүмкіндік береді. Бұл операциялардың құны 1,5 миллионнан басталып, 6 миллионға дейін жетуі мүмкін», — деді Тілеухан Әбілдаев.

Естеріңізге сала кетсек, жоғары технологиялардың көмегімен жасалатын медициналық қызметтерге жүрекке ота жасау, жүрек, бауыр, бүйрек алмастыру, мидағы қатерлі ісікке байланысты жасалатын нейрохирургиялық ота түрлері, тұқым қуалайтын және жүйелі ауруларды, лейкоз бен күрделі эндокриндік сырқаттарды емдеу сынды тағы да басқа аса күрделі хирургиялық операциялар жатады.

Бүгінде Қазақстанда жоғары технологиялық қызметтің 70-ке жуық түрі бар. Олардың тізімі Денсаулық сақтау министрлігінің бұйрығымен бекітілген.
Қызметтің бұл түрлерін пайдалану үшін не істеу қажет? Жоғары технологиялардың көмегімен емдеуді қажет ететін сырқатқа шалдыққан пациент аталған қызметті пайдалану үшін сақтандырылған болуы шарт.

● Пациент жоспарлы түрде ауруханаға жатқызу арқылы емделеді.
● Ең алдымен тіркелген емханаға хабарласады, дәрігерлер оны Ауруханаға жатқызу бюросы порталына тіркейді.
● Егер медқызметті жергілікті жерде көрсету мүмкін болмаған жағдайда комиссия оны республикалық деңгейдегі ауруханаға жатқызу мүмкіндіктерін қарастырады.
● Тиісті көрсетілімдер болса, құжаттар түгел өткізілген болса екі күн ішінде шешім қабылданады.
● Оң шешім шыққаннан кейін жолдама беріліп, ауруханаға жатқызылатын күнді белгілейді.

Комментарий