Жаңалықтар | НовостиҚұқық | Право

ДЕПАРТАМЕНТТЕГІ ЖАЛҒЫЗ ПОДПОЛКОВНИК

Әйел-ана отбасы жылуын сақтаушы, тіршіліктің гүлі, отбасының берекесі, қоғамның ертеңі болашақ балаларды тәрбиелеуші. Бүгінде нәзік жандылар ұрпақ тәрбиесімен қатар, кез келген қызмет саласында жемісті еңбек етіп келеді. Әр саланың өзіндік қиындығы мен жауапкершілігі бар. Осындай саланың бірі – Қылмыстық-атқару жүйесі.

Мұнда әйелдер ерлермен иық тіресе қызмет атқарып келеді. Осы орайда біз ҚАЖ саласының қыр-сырымен танысу үшін Қызылорда облысы бойынша ҚАЖ департаментіндегі жалғыз подполковник әйел Ақерке Темірбекқызымен әңгімелескен едік. Әділет подполковнигі Ақерке Темірбекқызы Қызылорда облысы бойынша Қылмыстық-атқару жүйесі департаментінде кадр саясаты тобының бас маманы болып қызмет етеді. ҚАЖ саласында 20 жылға жуық қызмет етіп келе жатқан тәжірибелі қызметкер М.Әуезов атындағы Оңтүстік Қазақстан мемлекеттік университеті мен Қызылорда қаласындағы «Болашақ» университетінің заңгер мамандығын оқып, диплом алған. Оқу орнын аяқтап, алғашқы еңбек жолын ЗК-169/5 мекемесінде кеңсе қызметінің инспекторы болып бастаған. Кеңсе қызметкері бола жүріп, шыңдалып, тәжірибе жинап ҚАЖ департаментінде штаб тобының, екінші арнайы тобының аға инспекторы, сотталғандардың еңбегін ұйымдастыру тобының бас маманы қызметтерін атқарған. 2020 жылдың шілде айынан бастап, департаменттегі кадр саясаты тобының бас маманы.
– Отбасында 3 ағайындымыз, жалғыз қыз болғандықтан әкеме жақын болдым. Әкем сияқты форма кию менің балалық арманым еді. Менің білім
алуыма, тұлға ретінде қалыптасуыма, нысанды киім киіп, құқық қорғау саласының қызметкері боламын деген арманыма әкем қарсы болмады. Өйткені, әкем де Ішкі істер саласында табан аудармай 30 жыл адал қызмет жасаған. Қыз балаға құқық қорғау саласында жұмыс жасау қанша қиын болса да, ата-анам мені қолдап, ақылын айтты, – дейді Ақерке Темірбекқызы.
Сөйтіп, Акеркенің бала арманы орындалып, нысанды киім киіп, ҚАЖ саласының қызметкері болды. Содан бері міне, 20 жылға жуық уақыт өтті. Құқық қорғау саласында ереже, тәртіп бәріне бірдей, ерлер немесе әйелдер деп бөлінбейді. Ол жұмыс барысында жас мамандарға Әдеп кодексінің ережелерін мүлтіксіз сақтауға, сыбайлас жемқорлыққа қарсы күресте барлық күш-жігерін қолданып, азаматтармен және әріптестермен сөйлескенде әдептілік және биязылық танытып, адал, әділ болуы және көпшілік мақұлдаған адамгершілік-әдептілік ережелерін сақтауы керегін айтып отырады. Ақерке Темірбекқызы ерлермен тең дәрежеде қызмет атқарып, талай жетістіктерге жетіп үлгерген. Жұмысына деген адалдығы еленіп, ҚР ІІМ-нің Құрмет грамотасымен, ҚАЖ комитетінің, департамент бастығының Грамоталарымен, Алғысхаттарымен бірнеше мәрте марапатталып, ІІІ дәрежелі «Мінсіз қызметі үшін» төсбелгісімен және «генерал-лейтенант Ш.Қабылбаев» медалімен марапатталды. Бұл дегеніміз оның қызметіне адалдығы, құқықтық сауаттылығының жоғары екендігінің дәлелі. Ақерке Темірбекқызы өмірде де, қызметте де жолы болған жан. Акеркенің жолдасы Нүркен әскери салада қызмет жасап, зейнеткерлікке шыққан.
«Қыз өссе – елдің көркі, гүл өссе – жердің көркі» дегендей, қызғалдақтай 3 қызына тәлім-тәрбие беріп отырған өнегелі отбасы. Қызметімен қоса отбасының берекесін кіргізіп отырған әділет подполковнигі Ақерке Темірбекқызын 8 наурыз – Халықаралық аналар мерекесімен құттықтап, отбасына бақ-береке, қызметіне табыс тілейміз!
Дана ДОСТАНОВА,
Қызылорда облысы бойынша
ҚАЖД қызметкері

Комментарий