Судья мінбері | Судебная система

Жемқорлықпен күрес күшейіп келеді

Сыбайлас жемқорлыққа қарсы күрес Қазақстандағы мемлекеттік саясаттың басты бағдарларының бірі болып табылады. Елімізде сыбайлас жемқорлыққа қарсы күрес үшін заңнамалық база құрылған. Осылайша, сыбайлас жемқорлыққа қарсы күрес саласындағы нормативтік-құқықтық база қолданыстағы ұлттық заңнаманы халықаралық стандарттарға жақындатқан 17 заңнама жақсартылған. Алдағы уақытта да бұл бағыттағы жұмыстар жетілдіріле бермек. 

Қазіргі таңда, «Сыбайлас жемқорлыққа қарсы іс-қимыл туралы» заңнамаға, сыбайлас жемқорлықпен байланысты құқық бұзушылықтар үшін жауапкершілікті қатайтып, процессуалдық заңнамаға бірнеше рет өзгеріс жасалды. Мүлікті тәркілеу, өмір бойы мемлекеттік лауазымды қызмет атқару құқығынан айыру секілді қатаңдатылған шаралар да қарастырылды. Сыбайлас жемқорлыққа қарсы іс-қимыл саласындағы халықаралық келісімдер мен халықаралық ынтымақтастықты жүзеге асыру мақсатында 2008 жылғы 4 мамырда Қазақстан Республикасы Біріккен Ұлттар Ұйымының сыбайлас жемқорлыққа қарсы конвенциясын да ратификациялады.

Сыбайлас жемқорлық әлеуметтік-экономикалық даму үдерісін, нарықтық экономиканың құрылуын, инвестициялар тарту процесін тежейді. Демократиялық мемлекеттің саяси және қоғамдық институттарына кері әсерін тигізеді, елдің болашақ дамуына елеулі қауіп төндіреді. Сондықтан онымен күрес тоқтамақ емес. Елімізде сыбайлас жемқорлыққа қарсы күрес мәселелерін реттейтін Қазақстан Республикасының Қылмыстық Кодексі, Әкімшілік құқық бұзушылық туралы кодексі, Еңбек кодексі, «Сыбайлас жемқорлыққа қарсы күрес туралы» Заңы, Қазақстан Респбуликасы Президентінің Жарлығымен бекітілген Қазақстан Республикасының мемлекеттік қызметшілерінің Ар-намыс кодексі негізгі нормативтік құқықтық актілері болып табылады.Заңнамалардың басты мақсаты – азаматтардың құқықтары мен бостандықтарын қорғауға, сыбайлас жемқорлық көріністерінен туындайтын қауып қатерден республиканың ұлттық қауіпсіздігін қамтамасыз етуге, осыған байланысты құқық бұзушылықтың, қылмыстың алдын алу, анықтау, олардың жолын кесу және ашу, олардың зардаптарын жою және кінәлілерді тиісті жауапқа тартумен қатар, демократиялық негіздерді, мемлекеттік басқарудағы жариялылық пен бақылауды кеңейтуге халықтың мемлекет пен оның құрылымдарына деген сенімдерін нығайтуға, білікті мамандарды мемлекеттік қызметке кіруге ынталандыруға, мемлекеттік міндеттерді атқаратын адамдардың риясыз адалдығы үшін жағдайлар жасауға бағытталған. Мемлекеттің дамуын тежейтін кеселмен жалпы қоғам болып күрескен жөн.

Жангабылова Мадина Габитовна, Алматы қаласы Медеу аудандық №2 сотының жетекші маманы

Комментарий