Саясат | Политика

Баспасөз хатшысы Нұрсұлтан Назарбаевтың денсаулығы туралы хабарлады

Желіде Елбасының денсаулығы мен физикалық жағдайына қатысты ақпарат пайда болды. Бұл көрсеткіштер Назарбаевтың Әзербайжанға сапары кезінде алынған

Елбасының баспасөз хатшысы Айдос Үкібай Қазақстанның тұңғыш президенті Нұрсұлтан Назарбаевтың фитнес құрылғысындағы көрсеткішті жариялады.

“Нұрсұлтан Назарбаев үшін салауатты өмір салтын ұстану үнемі басты назарда. Әзербайжанға сапары барысында уақыттың тығыз болуына қарамастан, Елбасы серуендеп үлгерді. Ол Каспий жағалауында шамамен төрт жарым шақырым жаяу жүріп өтті”, – деп жазды Айдос Үкібай өзінің Twitter-дегі парақшасында.

​Фитнес құрылғының көрсеткішіне сәйкес, Нұрсұлтан Назарбаев қашықтықты 1 сағат 16 минут ішінде жүріп өткен. Тыныштық күйіндегі жүрек қағысы – минутына 71 рет, қозғалыста – 82 рет.

Еске сала кетсек, биыл 6 шілде күні Қазақстанның тұңғыш президенті 79 жасқа толды. Қазіргі уақытта ол Қазақстанның Қауіпсіздік кеңесінің төрағасы.

Елбасы 14-15 қазан күндері Бакудегі Түркі кеңесінің VII саммитіне қатысты. Бірқатар екіжақты кездесу өткізді.

Комментарий