Елең еткізер | АктуальноҚоғам | Общество

Еліміздің қай өңірлерінде баспана бағасы өсті?

Теңгенің әлсіреуі тұрғын үйге де әсер етті. Еліміздің барлық қаласында пәтер құны қымбаттады. Бағаның әсіресе республикамыздың оңтүстік-шығыс өңірінде айтарлықтай өскені байқалады. Баспана бағасы қай қалаларда көтеріліп жатыр, Stan.kzақпарат агенттігі КТК арнасына сілтеп жауап береді.

Еліміздің өңірлеріндегі баспана бағасының өскені рас. Республика бойынша ең үлкен өсім Павлодарда – 3,5 пайыз. Керекуде үйдің әр шаршы метрі 185 025 теңгеге дейін көтерілді.

Екінші кезекте – Талдықорған. Көрсеткіші — 2,8 пайыз, пәтердің шаршы метрі 189 100 теңгеге жеткен. Қымбатшылық Өскемен қаласын да айналып өтпеді. Бұл өңірде 2,3 пайыз, шаршы метрдің орташа бағасы – 195 925 теңге.

Пәтер құны басқа қалаларда да қалысар емес. Маңғыстау мен Атырау облыстарында баға тұрақты. Ал аумағы үлкен, бизнес класты үйлерге қызығушылық төмендеген. Экономистер тұрғын үй бағасының шарықтауына сұраныстың артуы да әсер етті деп отыр. Теңгенің құнсыздануы жығылғанға жұдырық болған.

«Келесі жылы мемлекеттік бағдарламалар жүзеге асқаннан кейін сұраныстың көбеюіне әкеп соғады. Бағаның өсуіне тағы алып келеді. Қазір тек қана өсім болады. Доллар әлемдік нарықта болған соң, ол бізге әсерін тигізеді. Құрылыс материалдары шетелден алып келгеннен кейін ол бағаның ішіне кіреді», — дейді экономика сарапшысы Мақсат Сералы.

Сарапшылардың пікірінше, тұрғын үй құны 2019 жылы қатты құбылмақ. Сондықтан экономистер баспаналы болуды жоспарлағандарға бағаның арзандауын күткен бекер дейді. Мамандардың пікірі осындай.

Комментарий