Абай облысының әйелдер колониясында Қылмыстық-атқару жүйесі қызметкерлері күні қарсаңында салмағы 16 килограмм болатын гірді көтеруден турнир ұйымдастырылды. Іс-шараның басты мақсаты – қызметкерлер арасында салауатты өмір салтын насихаттау, олардың дене дайындығын арттыру және командалық рухты нығайту.
Жарысқа 15 ер қызметкер қатысты. Әрқайсысы өзінің күшін, төзімділігін және жоғары спорттық дайындығын көрсете білді. Алдын ала кезеңдердің қорытындысы бойынша бес қатысушы финалға өтті, онда жеңіс үшін күрес ерекше тартысты болды.
Финалда жарыс шектеулі уақыт ішінде гірді мүмкіндігінше көп көтеру форматына сәйкес өтті. Әрбір қатысушы жоғары қарқын мен дәлдікті сақтай отырып, бар күшін салды. Көрермендер жарысушыларды белсенді қолдап, сайыстың қызуын арттыра түсті. Күрес соншалықты шиеленісті болды, көшбасшы бірнеше рет ауысып, жеңімпазды соңғы секундқа дейін болжау мүмкін болмады. Нәтижесінде бақылаушылар қызметі бөлімінің бастығы, әділет капитаны Нұрбол Қуандыков жеңіске жетіп, өзінің ерекше күші мен төзімділігін, жинақылығын көрсетті.
— Физикалық дайындық — қызметтік міндеттерді сапалы орындаудың кепілі. Мұндай жарыстар бізге шабыт сыйлап, бірлігімізді арттыра түседі. Олар күш пен төзімділікті ғана емес, сондай-ақ қиындықтарды бір команда болып еңсеруді үйретеді, — деп атап өтті Нұрбол Қуандыков.
— Мұндай сайыстар кәсіби өсуді ынталандырады, стресстік жағдайларға қарсы тұру қабілетін дамытады және қызметтік жұмыста қажет төзімділікті нығайтады. Кәсіби құзыреттілікпен қатар қызметкердің дене дайындығы да аса маңызды. Спортпен тұрақты айналысатындар әрқашан жинақы, шапшаң және кез келген жағдайға дайын тұрады. Бүгінгі турнир — күш, тәртіп және командалық рухтың әрдайым қатар жүретінінің айқын дәлелі, — деді мекеме бастығы Уалихан Жумашев.
