Астана әкімдігіндегілер иіс газдан уланған балалардың денсаулығы туралы айтып берді, — деп хабарлайды Tengrinews.kz тілшісі.

Астана қаласы Қоғамдық денсаулық сақтау басқармасының мәліметінше, зардап шеккен балалардың екеуі үйіне жіберілді, қалған екеуі әлі де ауруханада. «Балалардың жағдайы орташа. Дер кезінде басталған емнің арқасында олардың өміріне қауіп жоқ. Барлық қажетті ем беріліп жатыр, балалардың жағдайы жақсарып келеді»,-деп хабарлады Астана қаласы әкімінің баспасөз хатшысы Эльвира Жүргенбаева. Еске салсақ, өрт 9 ақпанда екі қабатты жатақханадан шықты. Нәтижесінде 10 шаршы метр аумақтағы үй жабдықтары мен жиһаз жанып, тұншықтырғыш газдан уланған 2006, 2009, 2012 және 2013 жылы туған бір отбасының төрт баласы ауруханаға жеткізілген.